अहिल्यानगर | प्रतिनिधी
ahilyanagar lcb arrested 2 Absconding accused अहिल्यानगर जिल्ह्यातील अकोले तालुक्यात झालेल्या घरफोडी व जबरी चोरीच्या गुन्ह्याचा स्थानिक गुन्हे शाखेने छडा लावत दोन सराईत आरोपींना अटक केली आहे. या आरोपींकडून अकोलेसह जिल्ह्यातील एकूण 10 गुन्हे उघडकीस आले असून, या प्रकरणातील अन्य सात आरोपी आणि चोरीचा माल खरेदी केल्याचा आरोप असलेला एक आरोपी अद्याप फरार आहे.
घरात घुसून दागिने व रोख रक्कम लंपास
पोलिसांनी दिलेल्या माहितीनुसार, 16 मे 2026 रोजी पहाटे सुमारे 3 वाजण्याच्या सुमारास फिर्यादी अशोक केरू वाळुंज (रा. औरंगपूर, ता. अकोले, जि. अहिल्यानगर) व त्यांच्या कुटुंबीय झोपेत असताना चार अज्ञात आरोपींनी घरात प्रवेश केला. आरोपींनी फिर्यादी यांच्या पत्नीच्या गळ्यातील सोन्याचे दागिने जबरदस्तीने हिसकावून घेतले. तसेच घरातील कपाटातील सोन्या-चांदीचे दागिने आणि रोख रक्कम चोरी करून पसार झाले.
या प्रकरणी अकोले पोलीस ठाण्यात गुन्हा क्रमांक 309/2026 भारतीय न्याय संहिता (BNS) कलम 309(4) अन्वये गुन्हा दाखल करण्यात आला होता.
तांत्रिक विश्लेषण व गुप्त माहितीच्या आधारे कारवाई
पोलीस निरीक्षक संतोष मुटकुळे यांच्या मार्गदर्शनाखाली स्थानिक गुन्हे शाखेचे पोलीस उपनिरीक्षक कृष्णकुमार सेदवाड यांच्या नेतृत्वाखाली विशेष पथकाची स्थापना करण्यात आली. पथकाने घटनास्थळाची पाहणी करून तांत्रिक विश्लेषण, सीसीटीव्ही, तसेच गुप्त माहितीच्या आधारे तपास सुरू केला.
तपासादरम्यान 14 जुलै 2026 रोजी मुख्य आरोपी अजय सादीश काळे हा त्याच्या साथीदारांसह वाळकी (ता. जि. अहिल्यानगर) येथे येणार असल्याची माहिती पोलिसांना मिळाली. त्यानुसार पोलिसांनी सापळा रचून अजय सादीश काळे (वय 24, रा. वाळुंज) आणि अक्षय ऊर्फ सोन्या अर्पण भोसले (वय 26, रा. घानेगाव, ता. पारनेर) यांना ताब्यात घेतले.
चौकशीत गुन्ह्याची कबुली
पोलिसांच्या चौकशीत दोन्ही आरोपींनी अकोलेतील घरफोडीचा गुन्हा इतर साथीदारांसह केल्याची कबुली दिली. या गुन्ह्यात गणेश सुरेश भोसले, तुकाराम सुरेश भोसले, बाळू झारू भोसले, आशिष ठुब्या भोसले, शरद कैलास काळे, निकेश सादीश काळे आणि धिरज सादीश काळे हे सहभागी असून ते सध्या फरार आहेत.
याशिवाय आरोपी अजय काळे याने चोरीतील सोन्या-चांदीचे दागिने किरण भाऊसाहेब बेंद्रे याला विकल्याची माहिती चौकशीत दिली असून संबंधित आरोपीही फरार आहे.
सराईत आरोपींचा गुन्हेगारी इतिहास
अटक करण्यात आलेला अजय सादीश काळे हा सराईत गुन्हेगार असून त्याच्याविरुद्ध सुपा, पारनेर, भिंगार कॅम्प, एमआयडीसी (अहिल्यानगर) तसेच चाकण (पुणे) येथे दरोडा, जबरी चोरी, घरफोडी आणि चोरीचे एकूण 10 गुन्हे दाखल आहेत. त्यापैकी काही गुन्ह्यांमध्ये मोक्का कायद्यांतर्गतही कारवाई करण्यात आलेली आहे.
दुसरा आरोपी अक्षय ऊर्फ सोन्या अर्पण भोसले याच्याविरुद्धही पारनेर आणि चाकण पोलीस ठाण्यांमध्ये दरोडा, घरफोडी आणि जबरी चोरीचे चार गुन्हे दाखल असल्याचे पोलिसांनी सांगितले.
आणखी 10 गुन्ह्यांची उकल
दोन्ही आरोपींकडे सखोल चौकशी केली असता त्यांनी अहिल्यानगर जिल्ह्यातील विविध पोलीस ठाण्यांच्या हद्दीतील आणखी 10 गुन्ह्यांची कबुली दिली. यामध्ये अकोले, अहिल्यानगर तालुका, पारनेर, आश्वी, राहाता, लोणी आणि घारगाव पोलीस ठाण्यांच्या हद्दीतील घरफोडी व चोरीच्या गुन्ह्यांचा समावेश आहे.
पुढील तपास सुरू
अटक केलेल्या दोन्ही आरोपींना पुढील तपासासाठी अकोले पोलीस ठाण्याच्या ताब्यात देण्यात आले असून फरार आरोपींचा शोध सुरू आहे.
ही कारवाई अहिल्यानगरचे पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेचे पोलीस उपनिरीक्षक कृष्णकुमार सेदवाड तसेच पोलीस अंमलदार गणेश धोत्रे, फुरकान शेख, भाऊसाहेब काळे, अमोल कोतकर, बाळासाहेब खेडकर, अमोल आजबे, प्रशांत राठोड आणि चालक अरुण मोरे यांच्या पथकाने केली.
